அமெரிக்காவுடன் இன்று பலப்பரீட்சை: ஹாட்ரிக் வெற்றியை பதிவு செய்யுமா இந்திய அணி? | T20 WC

நியூயார்க்: ஐசிசி டி 20 கிரிக்கெட் உலகக் கோப்பை தொடரில் இன்று இரவு 8 மணிக்கு நியூயார்க்கில் உள்ள நசாவ் கவுண்டி மைதானத்தில் நடைபெறும் லீக் ஆட்டத்தில் ‘ஏ’பிரிவில் உள்ள இந்தியா - அமெரிக்கா அணிகள் பலப்பரீட்சை நடத்துகின்றன.

ரோஹித் சர்மா தலைமையிலான இந்திய அணி மட்டை வீச்சுக்கு கடும் சவாலாக திகழும் நசாவ் கவுண்டி மைதானத்தில் தொடர்ச்சியாக 3-வது ஆட்டத்தில் விளையாட உள்ளது. இந்த மைதானத்தில் இந்திய அணி தனது முதல் ஆட்டத்தில் அயர்லாந்தை 8 விக்கெட்கள் வித்தியாசத்தில் வீழ்த்தியிருந்தது. தொடர்ந்து பாகிஸ்தான்அணிக்கு எதிரான ஆட்டத்தில் 6 ரன்கள் வித்தியாசத்தில் ‘த்ரில்’ வெற்றி கண்டது. இரு வெற்றிகளின் வாயிலாக 4 புள்ளிகள் பெற்றுள்ளஇந்திய அணி தனது பிரிவில்முதலிடத்தில் உள்ளது.