பா.ரஞ்சித், மாரி செல்வராஜ் உடன் ஒப்பீடு - ‘லப்பர் பந்து’ இயக்குநர் தமிழரசன் பச்சமுத்து ஓபன் டாக்

சாதி ரீதியான வேறுபாடுகள் குறித்து தான் பார்த்ததையும், தன்னுடைய அனுபவத்தையும் ‘லப்பர் பந்து’ படத்தின் கதையில் சொல்லி இருப்பதாக அதன் இயக்குநர் தமிழரசன் பச்சமுத்து தெரிவித்துள்ளார். பா.ரஞ்சித், மாரி செல்வராஜ் படைப்புகளுடனான ஒப்பீடு குறித்தும் அவர் விவரித்துள்ளார்.

கடந்த 20-ம் தேதி திரையரங்குகளில் வெளியானது ‘லப்பர் பந்து’ திரைப்படம். தினேஷ், ஹரிஷ் கல்யாண், காளி வெங்கட் உள்ளிட்ட பலர் நடித்துள்ள இந்தப் படத்துக்கு ரசிகர்கள் மத்தியில் நல்ல வரவேற்பு கிடைத்துள்ளது. ரப்பர் பந்து 15 ரூபாய்க்கு விற்கும்போது தொடங்கும் கதை, 55 ரூபாய்க்கு விற்கும்போது முடிகிறது. இந்த இடைப்பட்ட காலத்தில் நடக்கும் உணர்ச்சிமிகு சம்பவங்களின் அழகான ‘மாண்டேஜ்’தான் படம். கிரிக்கெட்டை மையப்படுத்தி பல படங்கள் வந்திருந்தாலும், கிராமங்களில் நடைபெறும் கிரிக்கெட் போட்டிகளில் என்னென்ன அலப்பறைகள் நடைபெறும் என்பதை அழகாகக் கண்முன் கொண்டுவந்து நிறுத்தியிருக்கிறார், அறிமுக இயக்குநர் தமிழரசன் பச்சமுத்து.